Lissää Verolaitoksesta

Politiikkerit valtiopäivilä, kunnissa ja maakäräjilllä päättävät mitä veroja meilä oon ja minkä kokoset. Mutta työn sen etheen ette verot maksethaan, sen hoitaa Verolaitos, jolla oon kontturia koko maassa.

Verolaitos toimii hallituksen alasenna mutta oon valtiosta erihlään oleva viranomhainen. Se tarkottaa ette hallitus ei saata vaikuttaa yksittäisen ihmisen eli yrityksen verokysymykshiin.

Tässä saatat lukea Verolaitoksen päätehtävistä:

verot
henkilökirjotukset
perunkirjotukset.

Jos halvaat lissää tietoja, ota mielelhään kontakti lähhiimphään verokontturhiin eli soita meän vero-opastuksheen, tel 0771-567 567.

Verot

Verolaitos hoitaa Ruottin verot, joita oon erilaisia.

Tulovero

Ruottissa met maksama veroa kaikista tuloista, esim. palkasta, siukkarahasta ja pansuunista. Räntyt ja osaketulot ja voitot ko met myymä osinkoja/aktier, taloja eli omistusasuntoja räknäthään kans tuloiksi ja verotethaan. Met deklareeraama meän tulot kerran vuessa tulodeklarasjuunissa, esim. Internetin kautta. Tulovero mennee päänänsä kunnile ja maakäräjille, mutta kans valtiolle.

Momsi

Valtio ottaaa momsia (arvonlisävero) usseimista tavaroista ja palveluista jokka myyhän. Momsi sisältyy siihen hinthaan jonka met yksityishenkilöinä maksama. Usseimissa taphauksissa se oon 25 prosenttia. Joistaki tavaroista, esim. polttoaine, energia, alkohooli ja tupakka, valtio kans ottaa niin sanotun pisteveron.

Sosiaalimaksot

Kaikista työkorvauksista pittää maksaa sosiaalimaksot. Työnantaja maksaa tyntekiöitten sosiaalimaksot, tavalisesti kerran kuussa.

Verot elinkeinotoiminasta

Se jolla oon privaatti firma/elinkeinotoiminta eli kauppayhtiö/handelsbolag maksaa veron toiminan voitosta. Yrittäjä deklareeraa voiton tavalisessa tulodeklarasjuunissa.

Henkilökirjotus

Verolaitos hoitaa hekilökirjotuksen. Kaikki jokka asuvat Ruottissa henkilökirjotethaan. Se oon rekisteri siittä kukka asuvat Ruottissa ja missä net asuvat. Kaikki jokka henkilökirjotethaan, saavat henkilönumeron, jota käytethään esim. ko oon yhtheyessä viranomhaishiin. Henkilönumeroa ei ole kahta samanlaista ja siinä oon syntymäaika ja neljä muuta numeroa.