Eanet vearrodoaimmahaga birra

Vearrodoaimmahat lea ráđđehusa vuollásaš muhto lea friddja eiseváldi. Dat mearkkaša ahte ráđđehus ii sáhte váikkuhit ovttaskas olbmuid dahje fitnodagaid vearroáššiid.

Dás logat Vearrodoaimmahaga váldedoaimmaid:

• vearut
• álbmotčáliheapmi
• opmodatduođašteamit

Jos háledat eanet diehtit de leat buresboahtin guossástallat lagamus vearrokantuvrra dahje goaktadit min vearodieđiheami, tel. 0771-567 567.

Vearut

Vearrodoaimmahat hálddaša Ruoŧa vearuid mat leat máŋggaláganat.

Dinesvearru

Ruoŧas máksit vearu juohke sisaboađus, omd. bálkkás, skibasvuođaruđas ja penšuvnnas. Reanttut ja juolludeamit ja vuoitu go vuovdá ossosiid, dáluid ja orohatnjulgosiid leat maid dinesat ja galget vearuhuvvat. Oktii jagis mii čilget sisabođiimet dinesčilgejumis, omd. Interneahta bokte. Dinesvearru manná eanemusat suohkaniidda ja leanadikkiide muhto maid stáhtii.

Momsa

Stáhta geassá momssa (lasseárvovearru) eanas gálvvuin ja bálvalusain mii vuvdo. Momsa lea hattis maid priváhtaolmmožin máksit. Dábálaččat dat lea 25 proseantta. Muhtin gálvvuin, omd. boaldámušas, energiijas, alkoholas ja duhpáhis, stáhta maid geassá sierra vearu, nu gohčoduvvon dielkkovearru (punktskatt)

Sosiálamávssut

Sosiálamávssut galget máksot juohke bargobuhtadusas. Bargoaddi máksá bargiid ovddas sosiálamávssuid. Dat dahkko dábálaččat oktii mánus.

Vearru ealáhatdoaimmas

Son gii jođiha ovttaskas ealáhatdoaimma dahje gávpeovttastumi máksá vearu doaimma badjebázas.  Ealáhatdoaibmi čilge badjebáza dábálaš dinesčilgejumis.

Álbmotčáliheapmi

Vearrodoaimmahat fuolaha álbmotčáliheami. Visot geat orrot Ruoŧas čálihuvvojit. Álbmotčáliheamis registrerejuvvojit geat orrot ja gos orrot Ruoŧas. Visot geat čálihuvvojit ožžot persovdnanummara, mii ea.ie. boahtá adnui go goaktada eiseválddiid.  Persovdnanummaris, mii lea eareliiggán,  lea riegádanbeaivi ja nummar njealji siffariin.

Opmodatduođašteamit

Vearrodoaimmahat registrere opmodatduođaštemiid. Opmodatduođašteapmi lea áššebábir mii vuoseha jápma olbmo opmodaga ja velggiid.